Թեմ
Հրապարակված է: 02/13/2025
Ուրբաթ 7 Փետրուարի երեկոյեան, Ամերիկայի Միացեալ Նահանգներու Արեւմտեան Թեմի Առաջնորդ` Բարձրաշնորհ Տէր Յովնան Սրբ. Արք. Տէրտէրեան, ընկերակցութեամբ ընդհանուր փոխանորդ Հոգեշնորհ Տէր Երեմիա Վրդ. Աբգարեանի ներկայ գտնուեցաւ Արեւելքի Ասորի Եկեղեցւոյ Պատրիարք Նորին Ամենապատուութիւն Մար Աւա Գ Ռոյելին ընդունելութեան պաշտօնական արարողութեան, որ տեղի ունեցաւ Լոս Անճելըսի Արեւելքի Ասորի Սուրբ Մարիամ Աստուածածին եկեղեցւոյ մէջ: Յատնենք, թէ Ն.Ա. Պատրիարք Մար Աւա Գ Պատրիարքը անցեալ տարի այցելած էր Մայր Աթոռ Սուրբ Էջմիածին եւ հանդիպում ունեցած Ն.Ս.Օ.Տ.Տ. Գարեգին Երկրորդ Ծայրագոյն Պատրիարք եւ Ամենայն Հայոց Կաթողիկոսի հետ:
Սրբազան Հայրը յանուն Ամերիկայի Արեւմտեան Թեմին բարի գալուստ եւ ծաղկուն առաքելութիւն մաղթեց Ամենապատիւ Պատրիարքին, որ հովուական այցելութեամբ ժամանած էր Լոս Անճելըս:
Դիւան Առաջնորդարանի
10 Փետրուար, 2025
