Արեւմտեան Թեմի Եկեղեցիներուն Մէջ Տեղի Ունեցաւ Հանրապետական Եւ Սուրբ Էջմիածնի Մաղթանքներ

Տնօրինութեամբ Հիւսիսային Ամերիկայի Արեւմտեան Թեմի Առաջնորդ՝ Բարձրաշնորհ Տէր Յովնան Արք. Տէրտէրեանին, Կիրակի 2 Յունիսի առաւօտուն, յընթացս Սուրբ եւ անմահ Պատարագի, Թեմի բոլոր եկեղեցիներուն մէջ Հանրապետական եւ Սուրբ Էջմիածնի միացեալ մաղթանքներու կատարումով հանդիսաւորապէս նշուեցան Հայաստանի Առաջին Հանրապետութեան հռչակման 106-ամեակի եւ Կաթուղիկէ Սուրբ Էջմիածնի տօները:

Առաջնորդ Սրբազան Հայրը հանդիսապետելով Պըրպէնքի Սրբոց Ղեւոնդեանց Մայր Տաճարին մէջ մատուցուած Սուրբ Պատարագին, ներկայութեամբ հոգեւոր հայրերու եւ հոծ բազմութեան, Մայր Խորանին վրայ նախագահեց մաղթանքներուն եւ աղօթք բարձրացուց առ Աստուած Հայրենիքի ու Մայր Աթոռի անսասանութեան ու պայծառութեան համար:

Օրուան պատարագիչն էր Արժանապատիւ Տէր Մանուկ Աւագ Քահանայ Մարգարեանը, որ օրուան քարոզը փոխանցեց բնաբան ընտրելով Պետրոս Առաքեալի «Ահա մենք ամէն ինչ թողուցինք եւ Քո ետեւից եկանք» խօսքերը (Մտ 19.27): Անդրադառնալով օրուայ զոյգ խորհուրդներուն, Տէր Մանուկ Աւագ Քահանայ Մարգարեան ըսաւ.- «Մենք մեր առաջին Հայրապետի աչքերով պիտի նայենք, տեսնենք, հաւատանք եւ հասկանանք, որ Հիսուս շնորհ արեց մեր ազգին իր այցելությամբ եւ ցոյց տվեց մեր ժողովրդին այն երկիրը որ պիտի դառնար խաչը մեր գոյութեան եւ Տաճար մը՝ որ պիտի հանդիսանար տեսիլքը մեր անմահության եւ հավերժության: Եթէ հայրենիքը համարում ենք մեր ազգի գոյության խաչը, պիտի պատրաստ լինենք զոհվելու դրա համար, ինչպես Քրիստոս զոհվեց Իր խաչի համար, որովհետեւ դա էր Աստծու կամքը. եւ Տերը հարություն առավ եւ ասաց .«Ես հաղթեցի աշխարհին» (Յհ 16.33):  

Յիշենք, որ Արեւմտեան Թեմի Բարեխնամ Առաջնորդ՝ Գերաշնորհ Տէր Յովնան Արքեպիսկոպոս Տէրտէրեան Հայաստանի Առաջին Հանրապետութեան հռչակման 106-ամեակին եւ Կաթուղիկէ Սուրբ Էջմիածնի տօներուն առթիւ Թեմի բոլոր ծուխերուն յղած իր պատգամին մէջ շեշտած էր, թէ Սուրբ Էջմիածնի Մայր Տաճարը  դարեր շարունակ եղած է այն ամուր վէմը, որուն վրայ խարսխուած է քրիստոնէական մեր հաւատքը եւ կերտուած ու հաստատուած են հայոց ինքնութիւնն ու պետականութիւնը:
 
Զոյգ այս տօներուն առիթով Սրբազան Հայրը Բարձրեալն Աստուծոյ աղօթք բարձրացուց զօրութեամբ եւ միաբանութեամբ ընթանալու դէպի ազգային-եկեղեցական նոր խոյանքներ եւ նոր կերտումներ, մաղթելով, որ Ամենաբարին Աստուած խաղաղութիւն, շինութիւն, բարօրութիւն եւ ապահովութիւն պարգեւէ մեր հարենիքին՝ Հայաստանին եւ անսասանութիւն՝ Հայաստանեայց Առաքելական Սուրբ Եկեղեցւոյ:
 
Դիւան Առաջնորդարանի
Յունիս 3, 2024