Եթէ Չէք Մկրտուած Կիրակի 24 Ապրիլը՝ Սրբոց Նահատակաց Տօնը Դարձնենք Չմկրտուած Չափահասներու Ս. Մկրտութեան Եւ Ս. Միւռոնի Օր

Հիւսիսային Ամերիկայի Արեւմտեան Թեմը, Գերաշնորհ Տէր Յովնան Արք. Տէրտէրեանի նախաձեռնութեամբ եւ օրհնութեամբ, նախատեսել է բացառիկ ծրագիր, որը միտուած է օժանդակելու չմկրտուած չափահաս հայորդիներին:

Տասնամեակներ շարունակ հայ մարդը, մասնաւորաբար Մայր Հայրենիքում`համայնավարական ժամանակաշրջանում, մկրտուելու համար լուրջ խոչընդոտների է հանդիպել: Շատերը ցանկացել են մկրտուել, բայց ի վիճակի չեն եղել այն իրագործել`բազում խնդիրների պատճառով: Փառք Աստուծոյ` այսօր իրականութիւնը փոխուել է։

Հայց. Առաքելական Սբ. Եկեղեցւոյ Հիւսիսային Ամերիկայի Արեւմտեան Թեմը պատրաստակամ է որոշապէս լրացնել այդ բացը՝ մկրտել բոլոր այն չափահաս անձանց, ովքեր մինչեւ օրս մկրտուած չեն:

Սբ. Մկրտութեան խորհուրդը առաջին եւ հիմնական խորհուդն է Հայց. Առաքելական Սբ. Եկեղեցւոյ, քանզի միայն Սբ. Մկրտութեամբ է, որ անձը դառնում է քրիստոնեայ եւ անդամագրւում Սբ.  Եկեղեցուն:

Աւելին, կարեւոր է գիտակցել, որ Սբ. Մկրտութեան խորհուրդը կենսական անհրաժեշտութիւն է մեր փրկութեան համար, քանզի մեր Տէրն ու Փրկիչը` Յիսոս Քրիստոս, Ինքն ասաց, որ` «Եթէ մէկը ջրից ու հոգուց չծնուի (այսինքն` եթէ չմկրտուի), չի կարող Աստուծոյ Արքայութիւնը մտնել» (Յովհ. 3:5): Այս է նաեւ պատճառը, որ Յարութիւնից յետոյ Տիրոջ առաջին պատգամը վերբերում էր մարդկանց մկրտելուն եւ ուսուցանելուն (Մատթ. 28:20-21):

Մեր Տիրոջ պատգամները բոլոր ժամանակների եւ բոլոր սերունդների համար են, եւ այդ իսկ պատճառով Արեւմտեան Թեմը Սբ. Մկրտութեան խորհուրդն ուսուցանող եւ մեկնող մասնայատուկ դասընթացներ է կազմակերպել, որոնք նախապայման են Սբ. Մկրտություն այս բացառիկ ծրագրին մասնակցելու համար:

Դասընթացները տեղի են ունենալու 2022 թուականի Մեծ Պահքի շրջանում` Մարտ-Ապրիլ ամիսներին, ամէն Չորեքշաբթի, երեկոյեան ժամը 7:00-ին, Առաջնորդարանում: Նախատեսուած են վեց դասընթացներ, որոնց ցանկը կցում ենք յայտարարութեանը: Դասընթացներին կարող են մասնակցել նաեւ բոլոր այն մկրտուած հաւատացեալները, ովքեր փափագ ունեն կենսական գիտելիք ստանալու: Դասընթացների համար գրանցուելը նախապայման է:

Ծրագրին մասնակցելու եւ յաւելեալ տեղեկութիւններ ստանալու համար կարող էք դիմել Առաջնորդարանի գրասենեակ` զանգահարելով 818-558-7474 հեռախօսահամարով:
 
Դիւան Առաջնորդարանի