Թեմ
Հրապարակված է: 10/09/2020
Ադրբեջանի կողմից Արցախի դէմ սանձնազերծած ռազմական գործողութիւնների այս տագնապալի օրերին ադրբեջանական զինուած ուժերը հրետակոծութեան եւ հռթիռակոծման են ենթարկում ռազմական նշանակութիւն չունեցող խաղաղ բնակավայրեր, մայրաքաղաք Ստեփանակերտը, Շուշին եւ այլ քաղաքներ՝ խլելով անմեղ կեանքեր եւ մեծ վնաս պատճառելով խաղաղ բնակչութեանը։
Ադրբեջանը, միջազգային բոլոր պարտաւորութիւնների անտեսումով, թիրախաւորել է նաեւ Արցախ աշխարհի սրբավայրերն ու պատմամշակութային ժառանգութիւնը՝ բացայայտելով Արցախի հայաթափմանը եւ հայկական մշակութային ներկայութեան ոչնչացմանը միտուած իր դատապարտելի եւ այլեւս աւանդական դարձած քաղաքականութիւնը։ Այսօր՝ հոկտեմբերի 8-ին, խաղաղ բնակավայրերի հերթական հրետակոծութեան ժամանակ նշանառութեան տակ է առնուել եւ ռմբակոծուել Շուշիի Սուրբ Ամենափրկիչ Ղազանչեցոց եկեղեցին։
Մայր Աթոռ Սուրբ Էջմիածինը, դատապարտելով կատարուածը եւ դիտարկելով այն որպէս ծայրայեղ կրօնական անհանդուրժողականութեան դրսեւորում, կոչ է ուղղում Եկեղեցիների հովուապետերին, միջազգային հանրութեանը եւ կազմակերպութիւններին, միջեկեղեցական ու միջկրօնական կառոյցներին՝ վճռական ձայն բարձրացնելու յանուն արիւնահեղութեան կասեցման, Արցախի ժողովրդի ազատ ու անկախ կեանքի իրաւունքի պաշտպանութեան, հոգեւոր-մշակութային հնամենի ժառանգութեան եւ վկայութիւնների անխաթար պահպանման։
Հաւատաւոր մարդկանց կրօնական սրբազան զգացմունքների այսօրինակ անարգումը եւ աղօթատների նպատակային թիրախաւորումը ուղղակիօրէն հակասում են բոլոր կրօնների ուսուցանած պատգամներին։
