Թեմ
Հրապարակված է: 05/29/2020
Մայիս 26 Սարդարապատ և Մայիս 28, 1918 թուականները մեր ժողովուրդի պատմութեան մէջ արձանագրուած պիտի մնան յաւիտեան որպէս Յարութեան խորհրդանիշներ։ Մոխիրներուն մէջ դեռ հազիւ նոր բողբոջ դարձած մեր ազգի զաւակունք մեզի որպէս ժառանգ վստահեցան Մայր Հայաստանը՝ Սարդարապատի յաղթանակով ու Հայաստանի Հանրապետութեան հռչակումովը 1918 թուին։
Ոգեկոչել պատմական այս հանգրուանը մեր ազգի պատմութեան մէջ՝ կը նշանակէ լսել արեան կանչը մեր անմահ հերոսներուն, ովքեր Ս. Էջմիածնի ղօղանջներուն ներքոյ ուխտ կատարեցին՝ փրկելու Հայաստանը և այն դարձնելու լոյսի ու յոյսի փարոսը բոլոր սերունդներու համար։
Ոգեկոչել Հայաստանի Հանրապետութեան 1918 թուականը՝ կը պարտաւորեցնէ մեզ բոլորս մշտապէս աղօթել հայրենի պետականութեան ամրապնդմանը ի խնդիր և Հայաստանը պահել մեր մտասևեռումի կիզակէտի տակ։ Աշխարհասփիւռ հայութեան միութիւնը պայմանաւորուած է Մայր Հայրենիքով, որուն տեսիլքը իր ծնունդն է ունեցած Ս. Էջմիածինը։ Ահա այն սուրբ տեղին մէջ իրենց ուխտը կատարեցին հայոց քաջարի զինուորը, և Ս. Էջմիածնի խորանէն հաղորդուելով Սարդարապատ մեկնեցան յաղթանակի ղօղանջը իրենց սրտերուն մէջ։
Տ. Յովնան Արք. Տէրտէրեան
28 Մայիսի, 2020
