Թեմ
Հրապարակված է: 12/13/2019
Համատարած ողջ հայութեան նուիրական հոգևոր կենտրոնը՝ մայրը մեր Ս. Եկեղեցւոյ զաւակաց, Ս. Էջմիածնի տաճարը այս օրերուն թէև իր դռները փակած է վերանորոգութեան անյետաձգելի աշխատանքներու բերումով, բայց անոր սիրտը կը բաբախէ և անընդհատ պատգամ կը յղէ իր զաւակաց, բոլորիս անխտիր, որպէսզի մեր հոգու պարտքը կատարենք։
Ս. Էջմիածնի խորհուրդին վրայ է ամրագրուած մեր հայրենիքը իր բոլոր սրբութիւններով։ Պատմութիւն ուղեգծող աստուածային ոգեղէն ներկայութիւնն է Ս. Էջմիածինը, որուն ուղղելով մեր հոգու հայեացքը՝ կ’ապահովագրենք ոչ միայն մեր անձնական կեանքը, բայց մեր ողջ ազգին յաւիտենականութիւնը։
Մայր Հայրենիքի տեսիլքին ծնունդը և նոյն տեսիլքին զինուորագրեալ հերոսները՝ Վարդանանք և մինչև մեր օրերու նահատակները՝ Սարդարապատի սուրբերն ու Արցախեան քաջարի զինուորները, հաղորդուեցան Ս. Էջմիածնի կենարար սկիհէն և մնացին աւելի վեհ և վեր, քան հեռուները խեթուող ծափահարութիւնները, որոնց հեղինակները ամբողջապէս չզգացին զոհաբերեալ կեանքին ճշմարիտ խորհուրդը։
Ս. Էջմիածնի Մայր Տաճարը կը կանչէ ինձ և քեզ, բոլորիս անխտիր, որպէսզի անոր լուսեղէն պատկերին մէջ աղօթքի մրմունջ մը մենք դառնանք։
Անցեալէն մեզի վստահուած, բայց միշտ ներկայ Ս. Էջմիածինը այսօր կը կանչէ իր զաւակները որպէս հոգևոր մագնիսը, որպէսզի հաւատքով, քաջ ու համարձակ մեր հոգու պարտքը տանք։ Բանանք մեր հոգիները, միտքն ու սիրտը և այնտեղ պիտի գտնենք պատկերը Ս. Էջմիածնի։
Ս. Էջմիածնի խորհուրդին առաջ ծնրադրած են նոյնիսկ օտարազգիները և այն թարգմանած են որպէս հրաշքը մարդկութեան։
Բոլորով դառնանք հրաւէրի կանչ, որպէսզի Ս. Էջմիածնի խորհուրդին մէջ մկրտենք կեանքերը մեր ազգի զաւակաց, որպէսզի բոլորով դառնանք մեր օրերու զինուորները Վարդանանց և Սարդարապատին։
Անդադար միմեանց պատգամենք Ս. Էջմիածնի խորհուրդը և այն ժամանակ պիտի տեսնենք, որ ազգն ամբողջ կը վերածնի, կը դառնայ անլռելի կանչը մեր սուրբ նահատակներու։
Ս. Էջմիածինը դարերու ներկայութիւնն է այսօր և յաւիտեան, նոր կեանքին փարոսն է գալիք սերունդներու կեանքին մէջ։ Իր մէջ է խտացած խորհուրդը Հայաստանի և ոգին ազատատենչ Արցախին, և յաւէտ մայրական իր ներկայութեամբ ինչպէս իրարմէ անբաժան Մեծ ու Փոքր Մասիսները, ուր հանգչած է տապանը Նոյի։
Ս. Էջմիածինը անկրկնելի խորհուրդն է հայութեան ինքնութեան։ Ով կը խոնարհուի Ս. Էջմիածնի խորհուրդին առջև, կը բարձրանայ որպէս նոր մարդ։
Տ. Յովնան Արք. Տէրտէրեան
18 Օգոստոս, 2019
