Հայաստանյայց Առաքելական Սուրբ Եկեղեցու Հյուսիսային Ամերիկայի Արևմտյան Թեմ Հոգևորականաց Ժողով

2018 թվականի Մայիսի 3ին Լաս Վեգասի Սուրբ Կիրակոս եկեղեցում, Հյուսիսային Ամերիկայի Արևմտյան Թեմի Թեմական տարեկան ժողովի շրջանակներում տեղի ունեցավ թեմի Հոգևորականաց տարեկան երկրորդ ժողովը: Ժողովը նախագահում էր Հյուսիսային Ամերիկայի Արևմտյան Թեմի բարեխնամ առաջնորդ Տ Հովնան Արքեպիսկոպոս Տերտերյանը։  

2018 թվականի Մայիսի 3ին Լաս Վեգասի Սուրբ Կիրակոս եկեղեցում, Հյուսիսային Ամերիկայի Արևմտյան Թեմի Թեմական տարեկան ժողովի շրջանակներում տեղի ունեցավ թեմի Հոգևորականաց տարեկան երկրորդ ժողովը: Ժողովը նախագահում էր Հյուսիսային Ամերիկայի Արևմտյան Թեմի բարեխնամ առաջնորդ Տ Հովնան Արքեպիսկոպոս Տերտերյանը։  

Ժողովը բացվեց աղոթքով, որից հետո Արևմտյան Թեմի Առաջնորդ Տեր Հովնան արքեպիսկոպոս Տերտերյանը իր ողջույնի խոսքն ուղղեց քահանա հայրերին նրանց մաղթելով՝ արդյունավետ ծառայություն:

Սրբազան Հայրը ներկայացրեց Հայաստանում տիրող ներկա քաղաքական վիճակը և հորդորեց ամեն գնով սատար ու նեցուկ կանգնել Հայրենիքին, քանի որ Հայաստանի ներքին խաղաղության պահպանումը ամենակարևորն է ամեն մի հայի համար, և հզոր հայրենիքով է պայմանավորված նաև սփյուռքի հաջող գործունեությունը։ Իր հոգևոր պատգամի մեջ Սրբազան Հայրը հորդորեց ապրել խաչի խորհրդով՝ իբրև բոլորանվեր ծառայություն մեր Հայրենիքին, մեր Մայր եկեղեցուն և մեր սիրեցյալ հայ ժողովրդին։  «Մեր բովանդակ կեանքի ճանապարհը ուղեգծուած է ծառայութեամբ եւ ծառայակերպ կեանքը ընծայելու Աստուծոյ փառքին, եւ ի խնդիր մեր Սբ. Եկեղեցւոյ կառուցմանը: Եւ գիտենք անշուշտ, որ ապրող Եկեղեցին՝ ժողովուրդն է, որուն հովուութիւնը վստահուած է մեզի այսօրուան նիւթականացած աշխարհի կեանքին մէջ», -իր խոսքում ասաց Հովնան Սրբազանը։

Տեր Եղիշե քհն. Քսաճիկյանն անդրադարձավ քահանայից առանձնացման ծրագրին, որ գործում էր թեմում տարիներ առաջ։ Խոսեց դրանց օգտակարության ու կարևորության մասին և առաջարկեց վերսկսել այդ ծրագրի կազմակերպումը։ Առաջարկը հավանության արժանացավ ներկա հոգևոր հայրերի կողմից և հաստատվեց Սրբազան Հոր կողմից։

Քննարկվեցին եկեղեցական արարողակարգերին վերաբերող զանազան հարցեր, ինչպես օրինակ, Սուրբ Հաղորդության բաշխման, եկեղեցական արարողությունների ժամանակ որոշակի խնդիրների ու մարտահրավերների, մկրտության հետ առնչվող հարցեր:

Անդրադարձ եղավ նաև Թեմական մակարդակով անցկացվող զանազան միջոցառումներին և ձեռնարկներին։ Առաջնորդ Սրբազանը կարևորեց եկեղեցականների ներկայությունը այստեսակ ձեռնարկներին։

Սրբազանը հիշեցրեց նաև ազգային եկեղեցական տոնակատարությունների մասին՝ կարևորելով դրանց պատշաճ կազմակերպումն ու տոնախմբումը յուրաքանչյուր եկեղեցական համայնքում:    

Տեր Ներսես քհն. Հայրապետյանն անդրադարձավ Մայր Աթոռ Ս. Էջմիածնում ՆՍՕՏՏ Գարեգին Բ Ամենայն Հայոց Կաթողիկոսի կողմից հաստատված Հոգևորականաց վերապատրաստման ծրագրին։ Մայր Աթոռ Սուրբ Էջմիածնում կառուցված Գարեգին Առաջին կենտրոնի նորակառույց շենքը հատուկ տրամադրված է այս ծրագրի իրագործման համար։ Շենքը օժտված է ամեն հարմարություններով և նախատեսված է 27-30 մասնակիցների համար։ Տեր Հայրը նշեց, որ ծրագիրը բազմաբովանդակ ու բազմաշերտ է։ Այն միտված է նորոգելու և թարմացնելու հոգևորականների գիտելիքները, առիթ ստեղծելու բոլոր հոգևորականներին միմյանց հետ շփվելու և կուտակված հովվական փորձի փոխանակման, ծիսական, դավանաբանական հարցերի շուրջ միանմանություն հաստատելուն և այլն: Տեղի են ունենում դասընթացներ և ուխտագնացություններ: Տեր Հայրը առաջարկեց հոգևոր եղբայրներին իրենց անունները արձանագրել և այս ծրագրին ամսական դրույթով մասնակցել։

Տեր Ավետիս քհն, Աբովյանն անդրադարձավ թեմի երիտասարդաց ծրագրերին և ասաց, որ բավականին աճ է գրանցվել անցյալ տարիների համեմատությամբ թե ընթացքի, թե որակի և թե քանակի իմաստով: Ավելի լավ են կազմակերպվում երիտասարդաց առանձնացումները, Sports Weekend-ը: Տեր Հայրը նշեց, որ բավականին աշխատանքներ են կատարվել CYMA ծրագրի հետ կապված:  Տեր Հայրը խնրեց նաև հոգևորականներին հնարավորինս մեծ թվով մասնակցել երիտասարդաց ծրագրերին։

Տեր Գրիգոր քհն. Զաքարյանը խոսեց Հայ ճամբարի, Կիրակնօրյա դպրոցի մասին: Տեր հայրը տեղեկացրեց, որ նորոգության աշխատանքներ են կատարվում ճամբարում, որոնք պետք է ավարտվեն մինչև հուլիս ամիս: Տեր Գրիգորն նշեց, որ Կիրակնօրյա դպրոցների ղեկավար Գեյլ Չելեբյանը բավականին հաջող կազմակերպում է դասընթացները՝ հիմնված ավանդությունների ուսուցման և պահպանման վրա: Տեր հայրը նկատեց նաև, որ Սևակ Տերտերյանը ևս իր մասնակցությունը ունի այս ծրագրին, ով երեխաներին ուսուցանում է զանազան շարականներ:  

Ժողովն ավարտվեց Սրբազան Հոր օրհնությամբ։ Գոհություն հայտնելով հոգևորականներին իրենց ծառայության համար,  Առաջնորդ Հայրը մաղթեց նրանց քաջառողջություն և նվիրյալ ու արդյունաշատ աշխատանք․ «Ինչքան ուղիղ նայինք խաչի խորհուրդին, այնքան կը մերժենք մեր մէջ տկարութիւնը եւ մեր կեանքն ի սպաս կը դնենք յանուն մեր Սբ. Եկեղեցւոյ վերազարթօնքին, որը պայմանաւորուած է քրիստոնէական նկարագրի պահպանումովը: Մեր մէջ է հաւատքին ոյժը. կեանքի կոչենք այն: Մեր մէջ է Աստուծոյ ներկայութիւնը, հաղորդ դարձնենք այն նորահաս սերունդին: Մեր էութիւնն է Սբ. Էջմիածինը եւ Հայրենիքը, այն դարձնենք սրբութիւնը մեր ազգին»,-ամփոփեց Սրբազանը։