Թեմ
Հրապարակված է: 04/20/2018
Կիրակի, Ապրիլի 15-ին, բազմավաստակ Արժանաշնորհ Դոկտ․ Տ․ Զավեն Ավագ Քահանա Արզումանյանին նվիրված գնահատանքի հանդիսություն տեղի ունեցավ Գլենդեյլի Սբ. Պետրոս Հայց. Առաքելական Եկեղեցում:
Թեմիս Բարեխնամ Առաջնորդ՝ Գերաշնորհ Տ․ Հովնան Արքեպս․ Տերտերյանը ներկա գտնվեց սույն ձեռնարկին: Տեր Զավենը ավելի քան 64 տարի նվիրումով, անձնազոհությամբ և հավատքով իր ծառայությունն է մատուցել ու շարունակում է ծառայել:
.jpg)
Գլենդելի Սբ․ Պետրոս Հայաստանյայց Առաքելական Եկեղեցու Հոգևոր Հովվի՝ Արժ․ Տ․ Եղիա Քահանա Իսայանի և Ծխական Խորհրդի մտահղացումն էր գնահատանքի հանդիսութունը, որը քաջալերեց Տ. Զավենին:
Գնահատանքի ճաշկերույթին Առաջնորդ Սրբազան Հոր կողքին ներկա էր նաև Հոլիվուդի Սբ․ Հովհաննու Կարապետ Հայց․ Եկեղեցու Հոգևոր Հովիվ՝ Արժ․ Տ․ Մանուկ Ավագ Քահանա Մարգարյանը և Արժ. Տ. Հովսեփ Ավագ Քահանա Հակոբյանը:
Միջոցառմանը գնահատեցին բազմավաստակ հոգևորականին իր 64 տարիների անխոնջ ծառայության համար: Գնահատանքի արժանացավ նաև Երեցկին Ջոյսը, Տեր Հոր անբաժան կողակիցը, որը այս օրերին անհանգիստ լինելու պատճառով գտնվում է հիվանդանոցում։ Բոլոր ներկաները առողջության մաղթանքներ հղեցին նրան:
Գեղարվեստական բաժինը բաղկացած էր գեղեցիկ հայկական երգերով ու նվագով, որոնք հոգեկան մեծ բավարարություն պատճառեցին բոլոր ներկաներին:
Տեր Հոր հարուստ կենսագրությունը ամփոփ կերպով ներկայացրեց Սերգեյ Առուստամյանը որից հետո շնորհակալական խոսքով ելույթ ունեցավ ինքը՝ Զավեն Ավագ Քահանան:
Շնորհավորելով Տեր Զավենին, Սրբազան Հայրը իր փակման խոսքի մեջ անդրադարցավ Տեր Հոր նախանձախնդրությանը և բծախնդրությանը հանդեպ Հայց. Առաքելական Եկեղեցուն, ծեսին, պաշտամունքին, և կանոններին:
