Ամենայն Հայոց Կաթողիկոսը Մասնակցեց Հհ Նախագահի Երդմնակալութեան Արարողութեանը

Ապրիլի 9-ին Ն.Ս.Օ.Տ.Տ. Գարեգին Բ. Ծայրագոյն Պատրիարք եւ Ամենայն Հայոց Կաթողիկոսը ներկայ գտնուեց Կարէն Դեմիրճեանի անուան մարզահամերգային համալիրում հրաւիրուած Հայաստանի Հանրապետութեան Ազգային ժողովի յատուկ նիստին, որի ընթացքում տեղի ունեցաւ Հայաստանի Հանրապետութեան նորընտիր Նախագահ տիար Արմէն Սարգսեանի երդմնակալութեան արարողութիւնը:

Արարողութեան ընթացքում Ամենայն Հայոց Կաթողիկոսն իր պատգամը փոխանցեց ներկաներին, ապա միասնական Տէրունական աղօթքից յետոյ «Պահպանիչ» աղօթքով իր օրհնութիւնը բաշխեց ՀՀ Նախագահ Արմէն Սարգսեանին:

Ն.Ս.Օ.Տ.Տ. ԳԱՐԵԳԻՆ Բ ԱՄԵՆԱՅՆ ՀԱՅՈՑ ԿԱԹՈՂԻԿՈՍԻ ԽՕՍՔԸ

ՀԱՅԱՍՏԱՆԻ ՀԱՆՐԱՊԵՏՈՒԹԵԱՆ ՆԱԽԱԳԱՀ ՏԻԱՐ ԱՐՄԷՆ ՍԱՐԳՍԵԱՆԻ ԵՐԴՄՆԱԿԱԼՈՒԹԵԱՆ ԱՐԱՐՈՂՈՒԹԵԱՆԸ

Մեծարգոյ Նախագահ Հայաստանի Հանրապետութեան տիար Արմէն Սարգսեան,

Մեծարգոյ վաստակեալ Նախագահ տիար Սերժ Սարգսեան,

Մեծարգոյ Նախագահ Արցախի Հանրապետութեան տիար Բակոյ Սահակեան,

Յարգարժան Նախագահ Հայաստանի Հանրապետութեան Ազգային ժողովի տիար Արա Բաբլոյեան,

Բարձրապատիւ հոգեւոր հայրեր, պատուարժան պետական այրեր, դիւանագիտական առաքելութիւնների ներկայացուցիչներ,

Սիրելի ներկանէր,

Ուրախութեամբ ողջունում եւ Հայրապետական Մեր օրհնութիւնն ենք բերում ձեզ Հայաստանի Հանրապետութեան Նախագահի երդմնակալութեան առիթով: Փառք ենք մատուցում Բարձրեալ Տիրոջը, որ Իր ողորմութեամբ եւ երկնառաք շնորհներով մեր ժողովուրդը հայրենի պետութեան հովանու ներքոյ շարունակում է ապրել իր առաջընթաց կեանքը կերտելու անխախտ յոյսով ու հաւատով:

Մեր ժողովուրդը հայրենի պետականութիւնը վերականգնելու համար մաքառումների երկար ճանապարհ է անցել՝ դիմագրաւելով բազմաթիւ փորձութիւնների: Հայոց նորօրեայ անկախ պետականութիւնը մեր ազատատենչ ոգու եւ հաւաքական կամքի ձեռքբերումն է, մեր պայքարի եւ մաքառումների պսակն ու դափնին, մեր ժողովրդի բարօր ու առաջընթաց կեանքի գրաւականը: Անկախ մեր պետականութիւնը մեր ողջ ժողովրդի արժանապատուութիւնն ու հպարտութիւնն է, սպեղանին մեր կորուստների ու վշտերի, վկայութիւնը մեր վերհառնումի եւ հայրենակերտումի նախանձախնդրութեան: Զօրեղ ու ամուր պետականութիւն կերտելու ճանապարհին մեր երկիրը, արդարեւ, վճռորոշ վերափոխումներ է ապրել, ձեռքբերումներ արձանագրել, որոնք կերտուել են աշխարհասփիւռ մեր ժողովրդի կեանքի պայծառութեան տեսլականով, արդարութեան յաղթանակի հաւատով՝ ազգիս զաւակներին միաւորելով հայրենիքը զօրացնելու ձգտումով եւ հայրենիքով զօրեղ լինելու գիտակցութեամբ:

Հայաստանի Հանրապետութեան մեծարգոյ Նախագահ տիար Արմէն Սարգսեան, Մեր օրհնութիւնը, շնորհաւորանքներն ու բարեմաղթանքներն ենք բերում Ձեզ՝ Նախագահի բարձր պաշտօնում ընտրուելու եւ երդմնակալութեան առիթով: Մեր երկրի կեանքում Դուք արդիւնաւոր ջանքեր էք բերել որպէս Հայաստանի Հանրապետութեան վարչապետ, յաջողութիւններ արձանագրել դիւանագիտական ասպարէզում, նաեւ ազնիւ բարեգործութիւններով ներդրում բերել ազգային-եկեղեցական մեր անդաստանում: Այսօր երդմնակալութեան այս արարողութեամբ Դուք վերահաստատում էք Ձեր ուխտը հայրենիքին եւ մեր ժողովրդին ամենայն պատրաստակամութեամբ ու յանձնառութեամբ ծառայելու, ջանք ու եռանդ բերելու մեր երկրի զարգացման, մեր ժողովրդի բարօրութեան, հայութեան համախմբման եւ լուսաւոր ապագայի համար:  Ձեր հարուստ կենսափորձը, հայրենիքում ու սփիւռքում լայն ճանաչումը մեծապէս պիտի նպաստեն առաւել արգասաւորելու Ձեր ծառայութիւնը Նախագահի բարձր պատասխանատուութեան մէջ:

Երդմնակալութեան արարողութիւնը առիթ է նաեւ անդրադառնալու իւրաքանչիւրիս յանձնառութեանն ու պատասխանատուութեանը՝ նախանձախդրութեամբ շարունակելու միասնական մեր ջանքերը՝ յանուն ազգային նպատակների իրագործման: Առաքելական մեր Սուրբ Եկեղեցին, որ դարեր շարունակ արթուն է պահել անկախութեան վերականգնման մեր ժողովրդի իղձը, օրհնել ու քաջալերել մեր արդար պայքարները, այսօր էլ զօրակից է հայրենի պետութեանը եւ Ձեզ, մեծարգոյ նորընտիր Նախագահ, Ձեր ազգանուէր ու հայրենասէր ծառայութեան ճանապարհին: Սրբազան է մեր հայրենիքը իր բազմադարեայ պատմութեամբ ու նուիրական արժէքներով, իր հերոսներով ու նահատակներով, հայրենասէր երախտարժան իր զաւակներով: Այս նուիրական զգացումներով Մեր յորդորն ենք յղում մեր ժողովրդին ի հայրենիս եւ ի սփիւռս՝ հաւատով ու միասնութեամբ յաղթահարելու ազգային ու հայրենական անդաստանում ծառացած խնդիրները եւ դարձնելու մեր երկիրը շէն ու բարօր, պայծառ ու բարգաւաճ:

Մեր օրհնութիւնն ու գնահատանքն ենք բերում Հայաստանի Հանրապետութեան երրորդ Նախագահ տիար Սերժ Սարգսեանին՝ անցնող տարիներին մեր երկրին ու ժողովրդին բերած նուիրեալ ծառայութեան համար: Մեծարգոյ տիար Սերժ Սարգսեան, Դուք կանգնած էք եղել մեր պետականութեան վերակերտման ակունքներում: Ձեզ վիճակուած էր դժուարին պայմաններում առաջնորդելու մեր երկիրը՝ դիմագրաւելով ներքին ու արտաքին մարտահրաւէրներ` առաջ ընթանալու եւ իրագործելու ազգանպաստ ծրագրեր, ջանքեր բերելու միջազգային ասպարէզում մեր պետութեան հեղինակութեան բարձրացման, միջպետական յարաբերութիւնների զօրացման, Հայոց ցեղասպանութեան համընդհանուր ճանաչման ու դատապարտման, մեր երկրի առջեւ ծառացած խնդիրների յաղթահարման գործում: Տիրոջ պահպանութիւնը հայցելով՝ մաղթում ենք Ձեզ քաջառողջութիւն, արեւշատ կեանք եւ յաջողութիւններ Ձեր յետագայ գործունէութեան մէջ:

Աղօթում ենք աշխարհի խաղաղութեան, մեր հայրենիքի, մեր ժողովրդի խաղաղ, ապահով ու երջանիկ կեանքի համար: Մեր աղօթքն ենք բարձրացնում Ձեզ համար, մեծարգոյ Նախագահ տիար Արմէն Սարգսեան՝ հայցելով Տիրոջ օրհնութիւնն ու առաջնորդութիւնը Ձեզ Ձեր բարձր ու պատասխանատու առաքելութեան մէջ: Աղօթք ենք բարձրացնում հայոց պետական աւագանու համար՝ մաղթելով նոր ձեռքբերումներ ի սէր մեր հայրենիքի եւ ժողովրդի: Թող Տէրը օրհնի Հայաստան մեր երկիրը, Արցախն ու սփիւռքը՝ միշտ պահպանելով Իր Սուրբ Աջի խնամքի ու հովանու ներքոյ շինութեան, խաղաղութեան եւ անսասանութեան մէջ այսօր եւ միշտ: Ամէն: